സംഭാവന

വികസനം കുളം തൂര്‍ക്കും കാലത്ത് 

ഞാനൊരു കുളം കുഴിച്ചു .........!!!!

പാരമ്പര്യത്തിന്‍റെ 

കൊമ്പു മുളച്ച മത്സ്യങ്ങളെ 

അതില്‍ നീന്താന്‍ വിട്ടു ..

പതുക്കെപ്പതുക്കെ 

അവരാക്കുളം വലുതാക്കും ..

തല കറുപ്പിക്കും ബാല്യങ്ങള്‍ 

ഷവര്‍ ബാത്തില്‍ 

നഗ്നരായാടുമ്പോള്‍ 

കല്‍പ്പടവുകളിലെ 

സൌഹൃദപ്പേച്ചുകള്‍ 

ജലതരംഗങ്ങളാകുന്നു ....

അക്കരെയിക്കരെ മത്സരിക്കാന്‍ 

നീരിനാല്‍ പൂക്കുറ്റി തീര്‍ക്കാന്‍ 

ഊളിയിട്ടപ്പുവിന്‍ മുണ്ടഴിക്കാന്‍ 

തോളില്‍ ചവുട്ടി മറിഞ്ഞു ചാടാന്‍ 

നഗരം  മടുക്കും 

നാഗരികര്‍ക്കായ് 

പണിതുവയ്ക്കുന്നു 

കാവും കുളക്കടവും 

തറകെട്ടിയൊരാലും 

ഒരു കറുകപ്പുതപ്പും ........