തിങ്കളേ നിങ്കലെ തങ്കനിലാവൊളി
എങ്ങനെ എങ്ങു നിന്നെത്തി ചേര്ന്നു ?
പാലാഴി പെറ്റതു കൊണ്ടാണോ കൈലാസ
മാമല മേലെ ചിരിക്കയാലോ ?
നക്ഷത്ര കൂട്ടങ്ങള് തങ്കനൂല് കൊണ്ടു നിന്
ചുറ്റും വളയങ്ങള് തീര്ത്തതാലോ ?
മാണ്പെഴും ഏണങ്ങള് കൊമ്പുകള് കോര്ക്കുമ്പോള്
അങ്കുരിക്കുന്ന തീ നാളത്താലോ ?
നിന്നിലെ മാമല മഞ്ഞു പുതയ്ക്കുമ്പോള്
ഉണ്ടാകും വെള്ളി വെളിച്ചത്താലോ ?
നീലക്കാര്മൌലിയില് വെള്ളം ചുമക്കുന്നോന്
ചേലായി നിന്നെയും ചെര്ത്തതാലോ ?
അല്ലിത്താര് മാതുവിന് ചേലൊത്ത പുഞ്ചിരി
പൂച്ചൂടി നിന്നില് വിളങ്ങയാലോ ?
ആമ്പലും നീയും പരസ്പ്പരം രാത്രിയില്
കണ്ചിമ്മി ചാലെ കളിക്കയാലോ ?
എങ്ങനെയായാലും പാലൊളി വീശുന്ന
ചന്ദന ചന്ദ്രികേ കാണുംനേരം ?
കണ്ണുനീര് പോലും അലിഞ്ഞലിഞ്ഞില്ലാതെ -
യാകുന്നു തോന്നുന്നു ചാരിതാര്ത്ഥ്യം
വേദനപോലുമെന് മേനി മറക്കുന്നു
മാരിവില് നെയ്യുന്നു മാനസവും ..
No comments:
Post a Comment